Бишкек, 16.04.26 /Кабар/. Юстиция министрлиги пробация системасындагы адамдарды көзөмөлдөө үчүн заманбап санариптик инструменттерди камтыган бирдиктүү мониторинг экосистемасын сыноодон өткөрө баштады.
Министрликтен билдиришкендей, жаңы платформа коопсуздукту камсыз кылууда эки деңгээлдүү ыкманы сунуштайт:
- Жарандар смартфондогу Face ID технологиясы аркылуу аралыктан каттоодон өтө алышат. Бул инсандын өздүгүн жана жайгашкан жерин ыкчам тастыктоого мүмкүндүк берет.
- Үй-бүлөлүк зомбулукка жакын же өзгөчө көзөмөл талап кылган укук бузуучулар үчүн туруктуу мониторинг жүргүзүүчү электрондук билериктер колдонулат.
Тутум толугу менен кыргызстандык адистер тарабынан иштелип чыккан. Программалык камсыздоо Юстиция министрлигинин ички серверлеринде жайгашкандыктан, купуя маалыматтардын коопсуздугу толук кепилденет жана үчүнчү тараптардын кирүүсүнө жол берилбейт.
Жаңы чечим бюджеттик каражаттарды олуттуу үнөмдөөгө мүмкүндүк берет:
- Ата мекендик электрондук билериктер чет элдик аналогдорго караганда кыйла арзан.
- Чет өлкөлүк программалык камсыздоо үчүн лицензия сатып алуунун зарылдыгы жок, бул эксплуатациялык чыгымдарды кескин кыскартат.
Система көзөмөлдөн качуу аракеттерине каршы бекем коргоо менен жабдылган. Face ID технологиясы колдонуучунун "тирүү" катышуусун талап кылган anti-spoofing коргоосуна ээ. Ал эми электрондук билериктерди уруксатсыз чечүү же белгиленген аймактан чыгуу аракеттери тууралуу билдирүү реалдуу убакыт режиминде тийиштүү кызматкерлерге жөнөтүлүп турат.
”Учурда тутумдун программалык бөлүгү жана жүздү таануу алгоритмдери толугу менен аяктап, электрондук билериктер платформа менен ийгиликтүү интеграцияланды. Азыркы тапта түзмөктөрдүн дизайнын өркүндөтүү жана ишенимдүүлүгүн арттыруу боюнча акыркы иштер жүрүп жатат”,– деп айтылат маалыматта.
