Бишкек, 09.12.25. /Кабар/. Күн мурун борбор калаада Шанхай кызматташтык уюмунун (ШКУ) саммитине жана Дүйнөлүк көчмөндөр оюндарына даярдык көрүү боюнча Уюштуруу комитетинин кезектеги жыйыны өттү. Бул тууралуу президенттин Иш башкармалыгынан билдиришти.
Жыйын президенттин Иш башкармалыгынын - Уюштуруу комитетинин төрагасы Каныбек Туманбаевдин төрагалыгы алдында өткөрүлдү.
Уюштуруу комитетинин жыйынында ШКУ саммити жана Көчмөндөр оюндарын өткөрүү боюнча сунушталган жалпы сценарийлерди детализациялоо зарылдыгы белгиленди.
Каныбек Туманбаевдин айтымында, жаңы жылга чейин даярдыктын бардык аспектилерин камтыган так жана деталдуу иш-план толугу менен бекитилип, андан соң президентке сунушталат.
Жыйында министрликтер жана ведомстволор инфраструктура, коопсуздук, спорттук объектилер, маданий программалар жана логистика боюнча өздөрүнүн пландарын сунушташты.
Каныбек Туманбаев бул иш-чаралар өлкөнүн эл аралык аброюн аныктоочу маанилүү фактор экенин баса белгилеп, жооптуу жетекчилерге ишти өзгөчө жоопкерчилик менен, так мөөнөтүндө жана жогорку сапатта аткарууну тапшырды.
