Бишкек, 22.04.26. /Кабар/. Күн мурун транспорт жана коммуникациялар министри Талантбек Солтобаев кезектеги аппараттык жыйын өткөрдү.
Ведомстводон маалымдашкандай, жыйынга тиешелүү жетекчилер катышып, министрликтин алдындагы тапшырмалар талкууланды.
Солтобаев авариялык участоктор боюнча иш-аракеттер, долбоорлор толук кандуу жүрбөй, приоритеттер аныктала электиги үчүн Жол чарба департаментинин ишин сынга алды. Ошондой эле республика боюнча унаа жолдордун бирдиктүү реестрин тез арада бүтүрүүнү тапшырды.
Ошондой эле өлкө боюнча эскилиги жеткен бардык аялдамаларды этап-этабы менен жаңылоону өз мөөнөтүндө аткаруу милдеттендирилди.
Мындан тышкары, аң-чөнөктөрдү жамоо иштерин пландан тышкары, ыкчам аткаруу зарылдыгы, ошол эле сапатка көңүл буруу баса белгиленди.
Жыйындын соңунда министр тийиштүү жетекчилерге Нарын – Баетов унаа жолунун курулушун тездетүүнү, ШКУ саммити жана Дүйнөлүк көчмөндөр оюндарына карата, ошондой эле жайкы сезондун башталышына чейин унаа жолдорун ачуу, жол жээктерин иретке келтирүү боюнча күчөтүлгөн иштерди алып барууну тапшырды.
