Бишкек, 26.05.26. /Кабар/. Шанхай кызматташтык уюмунун саммитине карата даярдык иштери жүргүзүлүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Даярдыктын алкагында борбор калаанын архитектуралык көрүнүшүн жакшыртуу, шаар аймагындагы тартипти камсыздоо жана көрктөндүрүү талаптарынын сакталышын көзөмөлдөө багытында рейддик иш-чаралар өткөрүлүүдө.
"Иш-чаранын жүрүшүндө Ч. Айтматов көчөсү, 14, 18 жана 57 даректеринде жашаган тургундарга адистер тарабынан түшүндүрүү иштери жүргүзүлдү. Тургундарга фасаддардын тазалыгын сактоо, муниципалдык жер тилкелерин өз алдынча ээлеп албоо жана үйдүн жанындагы аймактарды заманбап шаар куруу талаптарына ылайык келтирүү боюнча эскертүүлөр берилди. Ошондой эле шаар аймагында мыйзамсыз кошумча курулуштарды орнотууга, санитардык ченемдерди бузууга жана жалпы пайдалануудагы аймактарды иретсиз пайдаланууга жол берилбей тургандыгы белгиленди" — деп айтылат маалыматта.
