Бишкек, 19.03.26. /Кабар/. Ош шаарындагы медициналык борбордун имаратына инженердик-техникалык текшерүү жүргүзүлдү. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, анда Ленин көчөсү №2/1 дарегиндеги “Клиника Ош” ЖЧКсы тарабынан курулуп жаткан курулуш объектиси текшерилди.
Иш-чара аталган объектинин курулуш иштери мамлекеттик ченемдерге жана сейсмикалык коопсуздук талаптарына шайкештигин аныктоо максатында уюштурулду. Адистер имараттын долбоордук документтерин кылдат карап чыгып, конструкциялык бөлүктөрүнүн ишенимдүүлүгүн баалоого багытталган өлчөөлөрдү жүргүздү.
Текшерүүнүн жыйынтыгында институт тарабынан курулуш конструкцияларынын техникалык абалы боюнча корутунду даярдалып, аларды мындан ары пайдалануу боюнча сунуштар иштелип чыгат.
