Бишкек, 27.03.26. /Кабар/. Суу ресурстары, айыл чарба жана кайра иштетүү өнөр жайы министри Эрлист Акунбековдун төрагалыгы алдында асыл тукум мал чарбасын өнүктүрүү боюнча кеңешме өттү.
Ведомстводон маалымдашкандай, кеңешменин жүрүшүндө мал чарбасын туруктуу өнүктүрүү, асыл тукум мал чарбасын өркүндөтүү, ошондой эле айыл чарба продукциясын кайра иштетүү маселелери талкууланды. Өзгөчө көңүл мал чарбасында сандык өсүштөн сапаттык өнүгүүгө өтүү зарылдыгына бурулду.
Баяндамачылар асыл тукум чарбаларды мамлекеттик колдоо, жасалма уруктандырууну жайылтуу, малдын генофондун сактоо, тоют базасын жакшыртуу жана адистерди даярдоо маселелерине токтолушту. Ошондой эле тармакта кооперацияны күчөтүү, чарбаларды ирилештирүү жана биргелешкен маалымат базасын түзүү зарылдыгы белгиленди.
Белгиленгендей, учурда республика боюнча 186 асыл тукум статусуна ээ чарба иш алып барууда. 2030-жылга чейинки артыкчылыктуу багыттардын бири катары бир уйдан жылына 5000 литр сүт алуу максаты коюлду. Жыйындын алкагында катышуучулар өз суроолорун берип, сунуштарын билдиришти.
