Бишкек, 29.06.26. /Кабар/. Салык кызматынын төрагасы Алмамбет Шыкмаматов Грузияга болгон иш сапарынын алкагында аталган өлкөнүн Финансы министрлигине караштуу Кирешелер кызматынын Ишкерлерди тейлөө борборуна барды.
Ведомстводон билдиришкендей, төрага борбордун ишмердүүлүгү, салык төлөөчүлөр үчүн электрондук сервистер, товарлардын кыймылын көзөмөлдөө боюнча санариптик чечимдер, тобокелдиктерди башкаруу системалары, салыктык контролдоонун электрондук инструменттери, ошондой эле контролдук-кассалык машиналар (ККМ) жана электрондук эсеп-фактуралар менен интеграцияланган платформалар менен таанышты.
"Грузиянын тажрыйбасы санариптештирүү тейлөө убактысын кыскартууга, адам факторунун таасирин азайтууга жана жарандар менен бизнес үчүн мамлекеттик кызмат көрсөтүүлөрдүн сапатын жогорулатууга мүмкүндүк берерин көрсөтүүдө.
Алынган тажрыйба Кыргызстанда санариптик сервистерди мындан ары өнүктүрүүдө жана салык кызматтарынын сапатын жогорулатууда изилденип, колдонулат", — деп айтылат маалыматта.
