Бишкек, 20.11.25. /Кабар/. Бүгүн өзгөчө кырдаалдар министринин орун басары Эрнест Жусупов Кытайдын China Railway International компаниясынын өкүлдөрүн кабыл алды.
Ведомстводон маалымдашкандай, алар Тогуз-Торо районундагы өрттү өчүрүү иштерине жардам беришкен.
Министрдин орун басары жолугушуунун жүрүшүндө кыргыз-кытай кызматташтыгына токтолуп, Кыргызстандын жол курулушуна зор салым кошуп жаткан кытай жолчуларына ийгилик каалады.
Ошондой эле ал жайлоодогу өрттү өчүрүүгө жардам бергендигине ыраазычылык билдирип, Өзгөчө кырдаалдар министрлигинин сыйлыктары менен сыйлады.
Эске салсак, 2025-жылдын октябрь айында Тогуз-Торо районунун Кара-Көң жайлоосунда болжол менен 10 гектар аянты өрттөнгөн. Өрт өчүрүүчүлөргө кошумча ошол аймакта иштеп жаткан China Railway International кытай компаниясынын 45 жумушчусу жардам берип, жайыттын калган аянты тилсиз жоодон сакталып калган.
