Бишкек, 02.06.26. /Кабар/. Бүгүн, 2-июнда Гапар Айтиев атындагы Кыргыз улуттук көркөм сүрөт искусство музейинде "Тамыр: бабалар мурасындагы эрк күчү" аттуу маданий-социалдык долбоордун көргөзмөсүнүн ачылыш аземи өттү.
Көргөзмөнүн башкы каармандары — оор онкологиялык илдеттерди жана турмуштун кыйын сыноолорун эрктүүлүк менен жеңип чыккан балдар.
Балдар "Кийиз дүйнө" коомдук фонду жана "Atalar_izi" этно-фотокөркөм студиясы тарабынан даярдалган ата-бабалардын нукура улуттук кийимдерин кийип, фотосессияга катышкан. Бул терең фотообраздар аркылуу маданий мурас, каада-салт жана тарыхый эс тутум өсүп келе жаткан муунга ишенимдүү тирек жана жашоо булагы экени чагылдырылат.
"Бул долбоордогу балдар — нагыз баатырлар. Алардын көзүндөгү от жана улуттук кийимдердеги бекемдик ата-бабаларыбыздын руху бүгүн да жашап жатканын далилдеп турат. Биз маданиятыбыз жана каада-салтыбыз аркылуу балдардын ички дүйнөсүнө дем берип, коомго үмүт тартуулагыбыз келди. Салттуу кийимдер жөн гана кездеме эмес, бул — оор сыноолорду жеңүүгө күч берген терең тамырыбыз жана генетикалык кодубуз", — деп белгиледи Кыргызстандын балдардын укуктары боюнча ыйгарым укуктуу өкүлү Асел Чынбаева.
Иш-чаранын башкы максаты — учурда онкологиялык оорулар менен күрөшүп жаткан башка балдарга жана алардын ата-энелерине моралдык колдоо көрсөтүү, рак илдети өкүм эмес, аны жеңсе болорун коомчулукка далилдөө болуп саналат.
