Бишкек, 10.03.26. /Кабар/. Ата-энелердин бала бакча тууралуу берген айрым көнүмүш суроолору баланын эмоционалдык абалына терс таасирин тийгизиши мүмкүн. Бул тууралуу педагог-психолог Полина Фурсова билдирди.
Анын айтымында, ата-энелер балдарынан көп учурда: "Сени ал жерден эч ким таарынткан жокпу?" же "Бүгүн бакчада сага кыйкырышкан жокпу?" – деп сурашат. Эгер мындай суроолор күн сайын кайталанса, бала аң-сезимдүү түрдө бала бакчаны кооптуу жай катары кабыл ала баштайт.
"Ата-эне күн сайын ушундай суроо берүү менен балага, бала бакча кооптуу жай, ал жерден сени таарынтышы мүмкүн деген кооптонууну таңуулагандай болот", – деп түшүндүрдү адис.
Психолог мындай суроолор бир нече терс натыйжаларга алып келерин белгилейт. Бала айланасындагылардын жүрүм-турумунан жалаң гана жаман нерселерди издей баштайт. Ал тургай оюн учурундагы кокустуктарды да "мени таарынтты" деп кабыл алышы мүмкүн. 3–4 жаштагы балдар ата-энесине жагууга аракет кылышат. Ошондуктан алар чоңдор күткөн жоопту бериш үчүн окуяларды ойлоп таба башташы ыктымал. Бала ата-энесинин тынчсыздануусун сезип, өзү жүргөн чөйрөнүн ишенимдүүлүгүнөн шек санай баштайт.
Адис мындай суроолордун ордуна баланын өз таасирлерин позитивдүү айтып берүүсүнө шарт түзгөн ачык суроолорду берүүнү сунуштайт.
Мисалы:
- "Бүгүн эмне эң кызыктуу болду?"
- "Бүгүн ким менен ойнодуң?"
- "Бүгүн сени эмне күлдүрдү?"
- "Бүгүн сага жакпаган бир нерсе болдубу?"
Мындай ыкма баланын ишенимин арттырып, анын бала бакчага болгон көз карашын оң нукка бурат.
