Бишкек, 01.06.26. /Кабар/. 1-июнь – Балдарды коргоонун эл аралык күнүнө карата Кыргызстандын прокуратура органдарынын кызматкерлери өлкө аймагында кеңири масштабдуу кайрымдуулук иш-чараларын өткөрүштү. Бул тууралуу Башкы прокуратурадан билдиришти.
Акциянын алкагында прокурорлор ата-энесинин камкордугусуз калган балдарга, балдар үйлөрүнүн, интернаттардын жана атайын мекемелердин тарбиялануучуларына колдоо көрсөтүштү.
Башкы прокуратуранын кызматкерлери көп жылдан бери камкордукка алып келген Беловодскийдеги балдардын психоневрологиялык мекемесине барып, бул жолу биринчи керектелүүчү буюмдарды, атайын коляскаларды, манеждерди жана тиричилик эмеректерин тапшырышты.
Мындан тышкары, республиканын бардык облус, райондорунда прокуратура кызматкерлери жер-жерлердеги адистештирилген балдар борборлоруна барып, майрамдык маанай жана белектерди тартуулашты.
