Бишкек, 15.06.26. /Кабар/. Кыргызстандын Куралдуу күчтөрүнүн Түштүк-Батыш оперативдик кол башчылыгынын 36806 аскер бөлүгүнүн базасында кыргыз жана түрк аскер кызматчыларынын биргелешкен окуу-жыйындары өтүүдө.
Коргоо министрлигинен билдиришкендей, үстүбүздөгү жылдын 1-июнунан тартып башталган машыгуулар Түркиядан келген тажрыйбалуу аскердик инструкторлордун жетекчилиги алдында өтүп жатат.
Окуу-тактикалык жыйындар атайын "Коммандос" программасы жана снайпердик даярдык боюнча уюштурулган.
Окуу-жыйындардын алкагында Түштүк-Батыш оперативдик кол башчылыгынын аскердик бөлүктөрүнүн ортосунда снайпинг боюнча атайын мелдештер өткөрүлүп, аскерлердин так атуу чеберчиликтери текшерилди. Буга чейин курстун катышуучулары татаал шарттардагы тоо даярдыгы боюнча окуу программасын ийгиликтүү аякташкан.
Куралдуу күчтөрдүн тажрыйбасын арттырууну көздөгөн "Коммандос" программасынын алкагындагы ички коопсуздук боюнча курстар ушул жылдын 30-июнуна чейин улантылат.
