Бишкек, 12.03.26. /Кабар/. Бүгүн Ош шаарында Литванын Ардактуу консулдугунун расмий ачылышы өттү. Бул тууралуу президенттин аймактагы өкүлчүлүгүнөн билдиришти.
Иш-чаранын алкагында президенттин өкүлү Аманкан Кенжебаев Литванын башкы консулу Шаруне Кубилюте жана ардактуу консул Медербек Орумбаев менен жолукту.
Кенжебаев Медербек Орумбаевди Литванын Оштогу ардактуу консулу болуп дайындалышы менен куттуктап, бул кадам эки өлкө ортосундагы байланышты чыңдай турганын белгиледи.
Литва тарапка Ош облусунун инвестициялык мүмкүнчүлүктөрү, өзгөчө айыл чарба продукцияларын кайра иштетүү жана туризм тармагы боюнча маалымат берилди.
Тараптар соода-экономикалык байланыштарды кеңейтүү, билим берүү жана маданий-гуманитардык долбоорлорду активдештирүүгө кызыкдар экендиктерин билдиришти.
Жыйынтыгында тараптар өз ара пайдалуу өнөктөштүктү өнүктүрүүнү макулдашты.
