Бишкек, 12.12.25. /Кабар/. Бишкек шаарынын Октябрь райондук прокуратурасынын жаңы административдик имараты пайдаланууга берилди. Бул тууралуу Башкы прокуратурадан билдиришти.
Ачылыш аземине башкы прокурор Максат Асаналиев, мамлекеттик бийлик органдарынын, укук коргоо түзүмдөрүнүн жана жалпыга маалымдоо каражаттарынын өкүлдөрү катышты.
Башкы прокурор жаңы имараттын ачылышын өлкөдө мыйзамдуулукту чыңдоого багытталган иш-аракеттердин маанилүү жыйынтыктарынын бири катары баалап, бул имараттын ишке берилиши жөн гана жаңы курулуштун пайдаланууга тапшыруу эмес, коомубузда мыйзамдуулукту жана адилеттүүлүктү чыңдоого багытталган маанилүү кадам экенин белгиледи.
Жаңы административдик имарат заманбап талаптарга ылайык курулуп, кызматкерлердин натыйжалуу иштөөсү жана жарандарды сапаттуу тейлөө үчүн тийиштүү шарттар түзүлдү.
