Бишкек, 01.06.26. /Кабар/. Индияда өткөн Шанхай кызматташтык уюмунун (ШКУ) Соода кеңешинин эл аралык диалогунда Кыргызстандын инвестициялык мүмкүнчүлүгү көрсөтүлдү. Бул тууралуу Соода-өнөр жай палатасынан билдиришти.
Эл аралык иш-чарага Кыргызстан, Индия, Ирак, Түштүк Корея жана башка өнөктөш өлкөлөрдүн дипломаттары, бизнес өкүлдөрү, өкмөт мүчөлөрү жана тармактык эксперттер катышты. Жыйындын башкы максаты өлкөлөр ортосундагы сооданы өнүктүрүү жана экономикалык кызматташтыктын жаңы багыттарын аныктоо болду.
Диалогдун алкагында Кыргызстандын Соода-өнөр жай палатасынын Индиядагы өкүлү Бектурган Калыбек уулу өлкөнүн мүмкүнчүлүктөрүн тааныштырды. Ал инвестициялык климатты жакшыртуу жана ишкерлерге шарт түзүү боюнча жасалып жаткан кадамдар, транспорттук жана логистикалык долбоорлорду өнүктүрүү тууралуу маалымат берди.
Ошондой эле Кыргызстан Азия менен Европа рынокторун байланыштырган негизги евразиялык транспорттук коридорлордун кесилишинде жайгашканын белгиледи.
Бул уникалдуу географиялык артыкчылык Кыргызстанды эл аралык инвесторлор жана ири бизнес үчүн транзиттик гана эмес, чоң мүмкүнчүлүктөрү бар маанилүү аймакка айлантары өзгөчө белгиленди.
