Бишкек, 21.05.25. /Кабар/. Ноокат районунда маданият үйүн капиталдык оңдоп-түзөө иштери жүрүп жатат.
Курулуш, архитектура жана турак жай-коммуналдык чарба министрлигинен билдиришкендей, долбоор республикалык бюджеттин эсебинен каржыланып, бардык чыгымдарды эске алганда жалпы тендердик баасы 26 млн сомдон ашат.
Оңдоо иштердин алкагында чатыры алмаштырылып, имараттын фасады жаңыланды, ошондой эле ички жасалгалоо иштери уланууда. Бүгүнкү күндө жалпы жумуштардын 70 пайызы бүткөрүлдү.
Белгилей кетсек, маданият үйү 500 адамга ылайыкташкан. Имарат 1990-жылы курулуп, ошол убактан бери бир да жолу капиталдык оңдоодон өткөрүлгөн эмес.
