Бишкек, 16.01.26. /Кабар/. 13-14-январь күндөрү Каратал-Жапырык мамлекеттик коругунун Каратал корук тилкесинде жапайы ача туяктуу жаныбарларга табигый чөп, шак-шыпыргылар жана тузду белгиленген жерлерге чачышты. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, бул чара кыш мезгилинде жапайы жаныбарлардын азыктануу мүмкүнчүлүгүн жакшыртууга, алардын популяциясын сактоого жана стресстик факторлорду азайтууга багытталган.
Маалымат үчүн: Каратал-Жапырык мамлекеттик жаратылыш коругу Нарын облусунун аймагында жайгашып, Кыргызстандын борбордук тоолорунун биологиялык ар түрдүүлүгүн сактоодо маанилүү экосистеманын бири болуп саналат.
Корукта аркар, кулжа, тоо эчкиси, марал, элик сыяктуу ача туяктуу жаныбарлар, ошондой эле карышкыр, ак илбирс, сүлөөсүн жана башка жырткычтардын түрлөрү жашайт.
Корук сейрек кездешүүчү канаттууларга да бай — алардын катарында тоо казы, кара кунас, каркыра, бүркүт, жана башка жапайы канаттуулардын түрлөрү бар.
