Бишкек, 12.06.26. /Кабар/. Нарын облусунда туристтик милиция кызматы иштей баштайт. Бул тууралуу облустук милициядан билдиришти.
Маалыматка караганда, аталган кызматтын курамына 20 кызматкер тартылып, алар туристтер көп барган аймактарда коомдук тартипти жана коопсуздукту камсыздоо боюнча кызмат өтөшөт.
"Туристтик милициянын негизги милдеттери туристтерге маалыматтык жана консультативдик жардам көрсөтүү, укук бузуулардын алдын алуу, коомдук коопсуздукту сактоо жана өзгөчө кырдаалдар жаралган учурда ыкчам жардам берүү болуп саналат", - деп айтылат маалыматта.
Белгиленгендей, кызматкерлер туристтик маршруттарда, эс алуу жайларында жана туристтер көп топтолгон аймактарда нөөмөт жүргүзүшүп, жергиликтүү жана чет өлкөлүк коноктор үчүн коопсуз шарттарды түзүүгө багытталган иштерди аткарышат.
Туризм тармагын өнүктүрүүдө коопсуздук башкы талаптардын бири болуп саналат. Туристтик милиция кызматынын ишке кириши туристтик сезондун тынч, коопсуз жана уюшкандыкта өтүшүнө өбөлгө түзөт.
Эскерте кетсек, ИИМдин демилгеси менен туристтердин коопсуздугун камсыз кылуу максатында өлкөнүн бардык аймактарында туристтик милиция кызматы түзүлүүдө.
