Бишкек, 16.02.26. /Кабар/. Кыргызстанда алгачкы жолу мамлекеттик деңгээлде туристтердин коопсуздугун камсыздоо максатында ири суммадагы камсыздандыруу ишке ашырылды. Бул тууралуу «Кабар» агенттигине Мамлекеттик камсыздандыруу уюмунан билдиришти.
Маалым болгондой, «Нарын – Кыш керемети» пресс-турунун алкагында чет өлкөдөн жана өлкө ичинен келген 38 катышуучу үч күндүк мөөнөткө жалпысынан 3 млн 800 миң сомго камсыздандырылды. Тактап айтканда, 38 туристке ар бирине 100 000 (жүз миң) сом өлчөмүндөгү камсыздандыруу полистери тапшырылган.
Бул демилге Нарын облусунун кооз жаратылышын, бай тарыхый-маданий мурастарын жана туристтик мүмкүнчүлүктөрүн кеңири таанытуу максатында уюштурулган. Иш-чарага Кытай, Өзбекстан, Казакстандан келген журналисттер, блогерлер жана туризм тармагынын эксперттери катышууда.
"Нарын – Кыш керемети" пресс-турунун негизги өнөктөштөрүнүн бири Мамлекеттик камсыздандыруу уюму болду. Иш-чарага уюмдун төрагасы Элдияр Калдарбеков катышып, чет өлкөдөн келген туристтер жана журналисттер менен жолугушуп, Нарын облусунун туристтик потенциалы тууралуу маалымат берди.
