Бишкек, 16.03.26. /Кабар/. Бишкек шаарынын ири эт базарларында мал уурдоонун алдын алуу жана ветеринардык коопсуздукту камсыз кылуу максатында масштабдуу рейд өттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, 14-мартта саат 02:00дө ветеринардык инспекторлор ИИМ жана Милициянын кайгуул кызматы менен биргеликте мобилдик топторду түзүп, борбор калаадагы "Ош" базары, "Алтын така", "Аламүдүн" жана "Орто-Сай" базарларын текшерүүгө алышты.
Текшерүү учурунда этти тиешелүү документтери жок ташуу жана сатуу аракеттери ачыкталды. Алсак, "Алтын така" базарында Mercedes-Benz үлгүсүндөгү унаа менен алып келе жаткан 16 бодо малдын этинин экөөсүнүн документи жок болуп чыккан. Ошондой эле Sprinter унаасынан табылган 5 бодо малдын этинин биринин ветеринардык документинин мөөнөтү өтүп кеткен.
Ошондой эле 3 жылкыны эч кандай коштоочу кагаздары жок таштап кетүү фактысы катталган.
Ал эми "Ош" базарында документи жок жылкы этин сатуу аракетине өз убагында бөгөт коюлду.
Аныкталган бардык фактылар боюнча түшүндүрүү иштери жүргүзүлүп, топтолгон материалдар мындан аркы иликтөө үчүн Ички иштер министрлигине өткөрүлүп берилди.
