Бишкек, 23.04.26. /Кабар/. Күн мурун транспорт жана коммуникациялар министринин орун басары Алмаз Тургунбаев Кытайдын транспорт министринин орун басары Ли Ян жана автотранспорт делегациясынын өкүлдөрү менен жолугушту.
Ведомстводон маалымдашкандай, жолугушууда автотранспорт тармагындагы эки тараптуу кызматташтыкты өнүктүрүү боюнча бир катар маанилүү маселелер талкууланды. Жыйындын жүрүшүндө тараптар Кыргызстандын Кытай, Россия жана Монголиянын ортосундагы Азия унаа жолдорунун тармагы боюнча эл аралык унаа ташуулары жөнүндө өкмөттөр аралык макулдашууга кошулуу мүмкүнчүлүгүн карашты.
Ошондой эле төмөнкү маселелер талкуунун өзөгү болду:
- Кыргыз жүк ташуучуларына Кытайда габаритсиз жүктөрдү ташууга атайын уруксаттарды берүү;
- Кыргызстандын жеңил унааларынын Кытай аймагына кирүүсү жана Кыргызстанда кытай таксилеринин ишмердүүлүгүн жөнгө салуу;
- Кыргызстан — Кытай — Өзбекстан эл аралык унаа каттамдары жөнүндө макулдашууга ылайык, уруксат кагаздарынын бланктарын даярдоо.
Тараптар транспорт жана логистика тармагындагы кызматташтыкты мындан ары да кеңейтүүгө жана эл аралык унаа ташууларын өнүктүрүүгө кызыкдар экенин белгилешти.
