Бишкек, 09.06.26. /Кабар/. Бүгүн Инвестициялар боюнча улуттук агенттиктин башчысы Равшанбек Сабиров кытайлык SL Gemini Energy Co., Ltd. компаниясынын делегациясы менен жолукту.
Агенттиктен билдиришкендей, жолугушууда тараптар кайра жаралуучу энергия долбоорлоруна инвестиция тартуу жана Кыргызстандын жылуулук менен камсыздоо тутумдарын модернизациялоо мүмкүнчүлүктөрүн талкуулашты.
Улуттук агенттиктин өкүлдөрү конокторго өлкөнүн инвестициялык климаты жана "жашыл" экономиканы колдоо чаралары тууралуу айтып беришти.
"Кыргызстан таза энергетика тармагында чоң потенциалга ээ. Биз заманбап технологияларды киргизүүгө жана узак мөөнөттүү долбоорлорду ишке ашырууга даяр болгон инвесторлорду тартууга кызыкдарбыз. Биз өз ара пайдалуу демилгелерди ишке ашырууда зарыл болгон колдоо көрсөтүүгө даярбыз", – деди Сабиров.
Сүйлөшүүнүн жыйынтыгында тараптар кызматташуунун мүмкүн болгон багыттарын биргеликте иштеп чыгууну жана болочок долбоорлордун параметрлерин терең изилдөөнү улантууну макулдашты.
