Бишкек, 26.03.26. /Кабар/. Бүгүн, 26-мартта тышкы иштер министри Жээнбек Кулубаев эксперттик коомчулук менен салттуу жылдык жолугушуусун өткөрдү.
ТИМден билдиришкендей, министр дипломатиялык кызматтын 2025-жылдагы ийгиликтерин жана келечектеги артыкчылыктуу багыттарды тааныштырды.
2025-жылдын негизги жетишкендиктери:
- Тажикстан менен мамлекеттик чек араны делимитациялоо процессинин аякташы аймактык коопсуздуктун башкы кепилдиги катары белгиленди.
- Жыл ичинде 190дон ашык расмий сапарлар болуп, 600дөн ашык документке кол коюлду. Эфиопия жана Египетте жаңы элчиликтер ачылды.
- "Электрондук консул" системасынын ишке кириши документтерди иштетүү мөөнөтүн 4 эсеге кыскартты.
Кыргызстан көп векторлуу саясат принцибин бекем карманып, Россия, Кытай, Борбор Азия жана Батыш өлкөлөрү менен тең салмактуу мамилени сактайт. Чыр-чатактарды эл аралык укуктун негизинде, тынчтык жолу менен чечүү позициясын жактайт.
2026-жылга коюлган милдеттер:
- Шанхай кызматташтык уюмунун 25 жылдыгына туш келген Бишкектин төрагалыгы өлкө үчүн стратегиялык мааниге ээ.
- VI Дүйнөлүк көчмөндөр оюндарын жана Чыңгыз Айтматов атындагы Ысык-Көл форумун жогорку деңгээлде өткөрүү аркылуу өлкөнүн эл аралык аброюн бекемдөө пландалууда.
Жолугушуунун соңунда Жээнбек Кулубаев ТИМ эксперттик сунуштарга жана конструктивдүү диалогго ар дайым ачык экенин баса белгиледи.
