Бишкек, 10.11.26 /Кабар/. Бүгүн Москва шаарында тышкы иштер министри Жээнбек Кулубаев россиялык кесиптеши Сергей Лавровдун чакыруусу боюнча Жамааттык коопсуздукту камсыз кылуу боюнча эл аралык форумга катышты.
Ведомствонун маалыматына караганда, ал "Көп уюлдуу дүйнөдөгү жамааттык коопсуздук" темасындагы пленардык жыйында сөз сүйлөдү.
Өз сөзүндө Кулубаев көп уюлдуу дүйнөлүк тартип калыптанып жаткан шартта өз ара ишенимди чыңдоонун маанилүүлүгүн баса белгиледи. Ошону менен бирге, көп уюлдуулук карама-каршылыктардын курчушуна эмес, БУУнун Уставына жана эл аралык укукка негизделген эл аралык мамилелердин кыйла адилеттүү жана тең салмактуу системасынын калыптанышына өбөлгө түзүшү керектигин белгиледи.
Министр Кыргызстандын 2027-2028-жылдары БУУнун Коопсуздук кеңешине мүчө болуусунун алкагында министр өлкөнүн чыр-чатактарды тынчтык жолу менен жөнгө салууга, көп тараптуу диалогду өнүктүрүүгө жана алдын алуучу дипломатиянын механизмдерин чыңдоого багытталган негизги артыкчылыктарын белгиледи.
Коопсуздук менен туруктуу өнүгүүнүн өз ара байланышы маселесине токтолуп, Кулубаев климаттын өзгөрүшүнө, мөңгүлөрдүн эришине жана суу ресурстарынын тартыштыгына байланышкан чакырыктарга өзгөчө көңүл бурду. Ушуга байланыштуу ал 2027-жылдын 21-23-октябрында Бишкек шаарында "Бишкек+25" Экинчи глобалдык тоо саммити өткөрүлөрү тууралуу маалымат берип, аталган иш-чарага активдүү катышууга чакырды.
