Бишкек, 28.10.25. /Кабар/. 20-23-октябрда Женева шаарында БУУнун Улуттар Сарайында ЮНКТАДдын 16-министрлер конференциясы болуп өттү.
ТИМден билдиришкендей, конференция бүткүл дүйнөлүк соода, инвестиция жана туруктуу өнүгүү маселелери боюнча БУУнун 2025-жылдагы эң маанилүү жана масштабдуу иш-чарасы болду.
Конференция Швейцариянын вице-президенти Гай Пармелендин (же Ги Пармалендин) төрагалыгы астында, “Келечекти түзүү: адилет, инклюзивдүү жана туруктуу өнүгүүнүн кызыкчылыгында экономикалык трансформацияга дем берүү” деген ураан менен өттү. Иш-чарага БУУнун башкы катчысы Антониу Гутерриш катышты.
Жолугушуунун соңунда “Женева консенсусу” деп аталган, ЮНКТАДдын кийинки 4 жылдагы артыкчылыктуу багыттарын жана ыйгарым укуктарын аныктаган жыйынтыктоочу документ кабыл алынды. Документ Пол Беккерс (Нидерланддар) жетектеген толук курамдагы комитетте төмөндөгү 8 тематикалык топтун (кластердин) алкагында иштелип чыкты: соода, өнүгүүнү каржылоо, санкциялар, климат, санариптик экономика, инвестиция, өкмөттөр аралык механизмдер жана Палестина.
Кыргыз Республикасы “инвестиция” тобун жетектеп, сүйлөшүүлөрдүн ийгиликтүү өтүшүнө олуттуу салым кошту.
Кыргыз делегациясынын аракети менен документке 2022-жылы президент Садыр Жапаровдун сунушу боюнча кабыл алынган “Тоолорду туруктуу өнүктүрүү” деп аталган БУУнун Башкы Ассамблеясынын 77/172 резолюциясын ишке ашыруу жөнүндөгү атайын абзац киргизилди.
Кыргыз делегациясынын башчысы, Элчи Омар Султанов деңизге чыгуу мүмкүнчүлүгү жок өлкөлөр тобунун министрлеринин жолугушуусунда сөз сүйлөп, Кыргызстандын банктарына каршы санкцияларды киргизүү негизсиз экенин белгиледи жана кыргыз товарлары үчүн ЕБнын рынокторуна кирүүгө чыныгы мүмкүнчүлүктөрдү түзүп берүүгө чакырды.
ЮНКТАД (БУУнун Соода жана өнүгүү боюнча конференциясы) 1964-жылы түзүлгөн, соода, финансы, инвестиция жана технологиялар маселелери боюнча БУУнун башкы органы. Ал эми министрлер конференциясы — анын төрт жылда бир чакырылуучу эң жогорку жетектөөчү органы.
