Бишкек, 11.02.26. /Кабар/. 4-8-февралда Түркиянын Анталия шаарында суу биоресурстарын өстүрүү боюнча XI илимий-практикалык семинар жана Аквакультура боюнча I эл аралык көргөзмө өттү.
Суу ресурстары, айыл чарба жана кайра иштетүү өнөр жайы министрлигинен билдиришкендей, көргөзмөгө Кыргызстандын төмөнкү балык чарба субъекттери катышты:
- "Аква Пром" ЖЧК;
- "Эфтар Агро Комплекс" ЖЧК;
- "Салих и Ко" ЖЧК;
- Тоют продукциясын сунуштаган BioJem заводу.
Аталган субъекттер көргөзмөдө өз продукцияларын көрсөтүштү. Алардын арасында: балык жана деңиз азыктары, анын ичинде форель икрасы жана ышталган балык азыктары, аквакультура үчүн атайын тоюттар.
"Аквакультура туруктуу азык-түлүк коопсуздугун камсыздоонун, экономикалык өнүгүүнүн маанилүү факторлорунун бири, ошондой эле жаратылыш ресурстарын натыйжалуу пайдалануунун багыты катары каралууда", - деп айтылат маалыматта.
Белгилей кетсек, семинар алгачкы жолу эл аралык көргөзмө менен биргеликте өткөрүлүп, көптөгөн өлкөлөрдөн катышуучуларды, илимдин, бизнестин, инвесторлордун, мамлекеттик органдардын жана өкмөттүк эмес уюмдардын өкүлдөрүн бир аянтчага чогултту.
