Бишкек, 19.06.26. /Кабар/. Күн мурун Бишкекте эмгек, социалдык камсыздоо жана миграция министринин орун басары Мирланбек Байгончоков Франциянын ички иштер министринин иммиграция маселелери боюнча атайын өкүлү Патрик Стефани менен жолукту.
Ведомстводон маалымдашкандай, жолугушуунун негизги максаты эки өлкө ортосундагы кызматташтыкты чыңдоо жана кыргызстандыктардын Францияда мыйзамдуу түрдө иш менен камсыз болуусуна шарт түзүү болду.
Тараптар эмгек миграциясы чөйрөсүндөгү актуалдуу маселелер боюнча кеңири пикир алышты.
Сүйлөшүүлөрдүн алкагында өзгөчө көңүл эки тараптуу өкмөттөр аралык расмий макулдашууну түзүү келечегине бурулду. Мындай келишим келечекте кыргыз жарандарынын Франция аймагында эмгек укуктарынын корголушуна жана коопсуз шарттарда иштешине жол ачат.
Жолугушуунун жыйынтыгында тараптар бул багытта кызматташууну мындан ары өнүктүрүүгө эки тарап тең өзгөчө кызыкдар экендигин ырасташты. Ошондой эле жетишилген келишимдерди иш жүзүнө ашыруу максатында биргелешкен иш-аракеттерди жигердүү улантууну макулдашты.
