Бишкек, 29.05.26. /Кабар/. Экономика жана коммерция министри Бакыт Сыдыков "Ачык кабинет: жоопкерчилик аймагы" медиадолбоорунун алкагында Аламүдүн районунда жайгашкан "Бек кабель" заводунун ишмердүүлүгү менен таанышты.
Министрдин айтымында, ишкана туруктуу өндүрүштүк көрсөткүчтөрдү көрсөтүүдө. Завод орто эсеп менен ай сайын 1 500 тоннага чейин алюминийди, 800 тонна жезди жана 3 200 тонна пластикатты кайра иштетет.
"Ишкана 2024-жылдын 5-июлунда ишке киргизилген. Завод чийки заттын ушул көрсөтүлгөн көлөмүн кайра иштетүүгө мүмкүнчүлүк берген заманбап жабдуулар менен камсыздалган. Бул жерде өндүрүлгөн продукция ички рыноктун суроо-талабын канааттандырууга, ошондой эле Евразия экономикалык биримдигине кирген өлкөлөргө экспорттоого багытталган", – деп белгиледи Бакыт Сыдыков.
Заводдун директору Кубан Бекбашев маалымдагандай, учурда ишканада 80 кызматкер эмгектенет, алардын басымдуу бөлүгү жергиликтүү тургундар. Келечекте жумушчу орундардын санын 150 адамга чейин жеткирүү пландалууда. Ал ошондой эле жумушчулардын эмгек акысы 50 миңден 100 миң сомго чейин экендигин кошумчалады.
