Декабрь айынын аягында жана январь айынын башында кыргызстандыктарды кышкы каникулдар, майрамдык дем алыш күндөр жана жаңы жылдык майрамдар күтөт. Бул мезгил активдүү эс алуу, тоо курортторуна саякаттоо жана өлкөнүн кооз аймактарын кыдыруу үчүн эң сонун учур. Кыргызстан кыш мезгилинде да туристтерди өзүнүн бийик жана ак карлуу тоолору, тунук көлдөрү жана кайталангыс жаратылыш кооздуктары менен тартып, ички туризм үчүн кеңири мүмкүнчүлүктөргө ээ.
Өткөн аптада "Каракол" тоо-лыжа курортунда кышкы туристтик сезондун расмий ачылышы Jaryk Fest 2025 улуттук фестивалы форматында өттү. Иш-чарага дээрлик 1500гө жакын катышуучулар жана көрүүчүлөр чогулду. Бул фестиваль өлкөдө жыл сайын өткөрүлүп, тоо-лыжа туризмин өнүктүрүүгө жасалган кадам болду.
Туризм департаменти белгилегендей, кыш мезгилинде Кыргызстанда төмөнкү багыттар эң популярдуу:
Тоо-лыжа туризми
Кыргызстан татаалдыгы ар кандай болгон тоо-лыжа трассаларынын кеңири түрүн сунуштайт. Эң популярдуу базалардын арасында "Каракол", "Орловка", "Чуңкурчак" , "Кашкулак", "ЗИЛ", "Тогуз-Булак" жана "Төө-Ашуу" бар.
Укмуш окуялуу туризм
Активдүү эс алууну сүйүүчүлөр үчүн Соң-Көлгө ат менен турлар, Ысык-Көлдүн капчыгайларына жөө баруу, кар унаалары менен тоо жолдорунда жүрүү жана бийик тоолуу аймактарда лыжа же сноуборд менен жүрүү жеткиликтүү.
Ошондой эле Нарын жана Чүй облустарындагы шаркыратмаларга жана тоңгон көлдөргө жөө баруу да популярдуу. Бул жерлер кооздугу жана муздуу пейзаждары менен туристтерди өзүнө тартат.
Этнографиялык жана таанытуучу туризми
Кышында активдүү эс алууну маданий жана жаратылышты изилдөө менен айкалыштыра аласыз. Канаттууларды байкоо, анын ичинде Ысык-Көлдө сейрек кездешүүчү фламинго жана улуттук парктарга экскурсиялар саякатыңызды андан дагы маңыздуу кылат.
Ден соолукту чыңдоочу эс алуу
Кыргызстандын термалдык булактары кышында да ачык. Туристтер ден соолугун чыңдоо жана эс алуу үчүн Ысык-Ата жана Теплие Ключи курортторуна жана Ысык-Көл облусунун ар кандай санаторийлерине бара алышат.
Кышкы муз тебүү жана оюн-зоок аянттары
Бишкек шаарында жана бүтүндөй Чүй облусунда үй-бүлө же достор менен коньки тебүүгө мүмкүнчүлүктөрдү сунуш кылган сезондук муз аянтчалары ачылууда. Бул жайларда муз тебүүчү аянтчалардан тышкары муз шоулары да өткөрүлөт. Бул алыскы сапарга чыкпай активдүү кышкы дем алыш күндөрүн өткөрүүнүн жеткиликтүү жолу.
Музга чыгуу
Музга чыгуу үчүн эң жакшы жерлер Ала-Арча улуттук паркы, Ак-Сай мөңгүсү жана шаркыратмалар, Кегети капчыгайы, "Шаркыратма" шаркыратмасы. Бул жерлер январдан мартка чейин абдан популярдуу жана эс алуунун бул түрү менен жаңыдан алектене баштагандарга да, тажрыйбалуу альпинисттерге да ылайыктуу.
Кыргызстандагы кышкы туризм ишмердүүлүктүн кеңири спектрин сунуштайт – лыжа курортторунан шаардык муз тебүү аянтчаларына чейин, экстремалдык музга чыгуудан тынч жаратылышты байкоого чейин өлкөнү ички жана эл аралык туристтер үчүн жагымдуу кылат.
