Бишкек, 29.01.26. /Кабар/. Кыргызстанда ымыркайлардын өлүм көрсөткүчү төмөндөдү. Бул тууралуу Саламаттык сактоо министрлигинин 2025-жылдагы ишмердүүлүгүнүн жыйынтыгын чыгаруу боюнча кеңешмеде айтылды.
Ведомстводон маалымдашкандай, көрсөткүч 1000 тирүү төрөлгөнгө 13,5ти түзүп, мурунку жылга салыштырмалуу 4,2 пайызга төмөндөгөн.
Ошол эле учурда ымыркайлар өлүмүнүн себептеринин түзүмү өзгөрүүсүз калган:
- биринчи орунда перинаталдык мезгилдеги оорулар — 65,7 % (1224 бала);
- экинчи орунда тубаса өнүгүү кемтиктери — 15,5 % (289 бала);
- үчүнчү орунда дем алуу органдарынын оорулары — 8,2 % (152 бала).
Ошол эле маалда жугуштуу жана паразитардык оорулар боюнча 28,1 пайыздык өсүш катталган.
