Бишкек, 11.05.26. /Кабар/. Кыргызстанда евростандартка жооп берген сапаттуу күйүүчү май өндүрүлө баштайт. Бул тууралуу президенттин администрациясынын маалыматтык саясат кызматынын жетекчиси Дайырбек Орунбеков социалдык тармактагы баракчасына жазды.
Анын айтымында, өлкөдө нефтини өндүрүп, кайра иштетүү багытында активдүү иштерди жүргүзүүдө.
"Учурда “Кыргызнефтегаз” жана “Жунда” нефть кайра иштетүүчү заводдорунда модернизация иштери кызуу жүрүп жатат. Бул заводдор жаңылангандан кийин евростандартка жооп берген сапаттуу күйүүчү май өндүрүлө баштайт", - деп жазды ал.
Орунбеков Америка менен Израиль Иранга каршы согуш аракеттерин баштагандан бери дүйнө жүзүндө газ жана күйүүчү майдын баасы кескин кымбаттаганын белгиледи.
"Бул көрүнүш биздин өлкөгө дагы түздөн-түз таасирин тийгизүүдө. Мурда согуш башталганга чейин Россиядан АИ-92 үлгүсүндөгү бензиндин тоннасын 650 доллардын тегерегинде алып келсек, учурда анын баасы орточо 950 доллар. Ал эми дизель отунун мурда тоннасы болжол менен 700 доллар болсо, азыр 1200 доллардан ашты.
Айрым жарандарыбыз “эмне үчүн кошуна Казакстанда күйүүчү май арзан да, бизде кымбат?” - деген суроону берип жатышат. Мунун негизги себеби – Казакстанда ири нефть ресурсу бар, өздөрү өндүрөт жана күйүүчү май мамлекет тарабынан субсидирование болот. Башкача айтканда, мамлекет каржылап өз эсебинен бааны төмөн кармап турат.
Бизде дагы ушундай эле практика электроэнергия тармагында колдонулат. Мисалы, Кыргызстанда электр энергиясынын өздүк баасы 3 сом 7 тыйын болсо, элге 1 сом 64 тыйындан берип жатабыз. Ортодогу айырманы мамлекет субсидирование кылат.
Казакстан дагы күйүүчү май боюнча ушундай жолду колдонуп келет. Эгер Кыргызстанда ири нефть запастары болгондо, биз дагы элге күйүүчү майды арзаныраак бермекпиз. Ошондуктан өзүбүздө жок ресурстар үчүн бири-бирибизди күнөөлөп наалыбай, маселеге реалдуу карайлы", - деди ал.
