Бишкек, 12.11.26. /Кабар/. Кыргызстанда жүрөк-кан тамыр, бөйрөк жана онкологиялык ооруларды аныктоо, дарылоо, ошондой эле шашылыш медициналык жардам көрсөтүү боюнча 60тан ашык алгоритм иштелип чыкты.
Саламаттык сактоо министрлигинен билдиришкендей, жаңы алгоритмдерди жана бейтаптарды дарылоонун бирдиктүү тартибин өлкөнүн бардык медициналык мекемелерине киргизүү иштери жүрүүдө.
Бул багытта 10-12-ноябрда Бишкекте медицина кызматкерлери үчүн окутуу тренингдери өтүп жатат. Башка облустардын дарыгерлери онлайн форматта окуудан өтүүдө.
Демилгенин максаты — бейтаптарга жашаган жерине карабастан өз убагында жана сапаттуу медициналык жардам көрсөтүү, өлүмгө учуроо жана майыптык тобокелдигин азайтуу.
