Бишкек, 19.10.26. /Кабар/. Кыргызстанда акыркы тогуз айда 33 мектеп, 37 мекеме курулду.
Улуттук статистика комитетинин маалыматы боюнча, 2026-жылдын январь–сентябрь айларында курулуштун дүң продукциясынын көлөмү 380,0 млрд сомду түзүп, 2025-жылдын тиешелүү мезгилине салыштырмалуу 62,2%га өстү.
Негизги капиталга инвестициялардын көлөмү 365,7 млрд сомду түзүп, 68,5%га көбөйдү. Инвестициялардын 85%ы пайдалуу кендерди казууга, иштетүү өндүрүшүнө, транспортко, энергетикага, билим берүү объекттерине жана турак жай курулушуна багытталды.
2026-жылдын январь–сентябрь айларында:
- "Менин үйүм" программасынын алкагында 3 217 батирдин курулушу аяктады;
- 33 мектеп, 3 оорукана, 17 амбулаториялык-бейтапканалык мекеме жана 37 мектепке чейинки мекеме курулду;
- Энергетика тармагында бир катар чакан ГЭСтер жана энергетикалык объекттер пайдаланууга берилди;
- Балыкчы–Кочкор темир жолунун 63 чакырымдык участогунун курулушунун биринчи этабы башталды;
- Өндүрүш, логистика жана туристтик инфраструктура багыттарында жаңы объекттер ишке киргизилди.
2026-жылдын октябрь айынын башына карата жалпы узундугу 1 668 чакырым автомобиль жолуна асфальт төшөө иштери аяктады.
Курулуш секторунун ИДПнын өсүшүнө кошкон салымы 4,18 пайыздык пунктка бааланып, ИДПнын түзүмүндөгү үлүшү 9,1%ды түздү.
