Бишкек, 18.03.26. /Кабар/. Кыргызстанда ветеринардык коопсуздукту камсыздоо максатында мал ылаңдарына каршы вакцина чыгаруучу заманбап завод курулат. Бул маселени суу ресурстары, айыл чарба жана кайра иштетүү өнөр жайы министри Эрлист Акунбеков "Алтын Тамыр" акционердик коомунун өкүлдөрү менен талкуулады.
Ведомстводон маалымдашкандай, заводдун курулушуна болжол менен 10 млн доллар жумшалат. Мамлекет тарабынан жеңилдетилген насыялар жана инвесторлор үчүн өзгөчө шарттар каралууда.
Министр заводду кыска мөөнөттө куруп бүтүрүүнү, вакцинанын сапатын эл аралык стандартка жеткирүүнү жана сатып алуунун оптималдуу программасын иштеп чыгууну тапшырды.
Белгилей кетсек, учурда "Алтын Тамыр" 20га жакын биопрепарат чыгарат. Жаңы ишкана ички рынокту гана камсыздабастан, продукцияны Казакстан, Өзбекстан, Азербайжан жана Афганистанга экспорттоону көздөйт.
