Бишкек, 05.06.26. /Кабар/. Маданият, маалымат жана жаштар саясаты министринин биринчи орун басары Союзбек Надырбеков Түркиянын Кино департаментинин башкы директору Бирол Гүвен менен жолукту.
Ведомстводон маалымдашкандай, жолугушуу Бишкекте Түрк кино күндөрүнүн алкагында өтүп, анда эки өлкөнүн кино жана анимация тармагындагы кызматташтыгын жаңы деңгээлге көтөрүү маселеси талкууланды.
Сүйлөшүүнүн жыйынтыгында эки өлкөнүн режиссёрлору биргеликте көркөм тасмаларды жана заманбап анимациялык (мультфильм) долбоорлорду иштеп чыгуу, кино жана телерадио тармагындагы адистердин квалификациясын жогорулатуу жана тажрыйба бөлүшүүнү жолго коюу, Түркиянын ири медиа гиганттары (TRT) менен Кыргызстандын башкы телеканалдары жана "Кыргызфильм" киностудиясы ортосунда түз байланыштарды чыңдоо макулдашылды.
Белгилей кетсек, жолугушууга Кыргызстандын УТРК, ЭлТР телеканалдарынын жетекчилери жана киностудиялар, ал эми Түркиядан атактуу TRT телерадиокорпорациясынын жетекчилиги катышты.
