Бишкек, 27.05.26. /Кабар/. Нью-Йорк шаарында тышкы иштер министри Жээнбек Кулубаев Сербиянын тышкы иштер министри Марко Журич менен жолукту.
Ведомстводон маалымдашкандай, жолугушуунун жүрүшүндө тараптар кыргыз-серб мамилелеринин ырааттуу өнүгүп жатканын жана достук менен өз ара түшүнүшүү духунда бардык багыттар боюнча кызматташууну мындан ары кеңейтүү үчүн олуттуу потенциал бар экенин канааттануу менен белгилешти.
Министрлер эки мамлекет ортосундагы кызматташтыкты тереңдетүүнүн келечегин талкуулап, ар кандай деңгээлдеги өз ара сапарларды уюштуруу аркылуу саясий диалогду активдештирүүнүн маанилүүлүгүн баса белгилешти. Соода-экономикалык кызматташтыкты кеңейтүү, келишимдик-укуктук базаны чыңдоо жана өз ара кызыкчылык жараткан биргелешкен демилгелерди ишке ашыруу маселелерине өзгөчө көңүл бурулду.
Жолугушуунун жыйынтыгында алар эки тараптуу кызматташтыкты мындан ары бекемдөөгө умтулуусун ырастап, эл аралык жана аймактык күн тартибиндеги актуалдуу маселелер боюнча, анын ичинде көп тараптуу аянтчалардын алкагында тыгыз өз ара аракеттенүүнү улантууга даяр экендиктерин билдиришти.
