Бишкек, 26.03.25. /Кабар/. Кыргызстан менен Кытай маданий байланыштарды чыңдоого ниеттенүүдө.
Ведомстводон билдиришкендей, бүгүн 26-мартта Улуттук тарых музейинде маданият, маалымат жана жаштар саясаты министри Мирбек Мамбеталиевдин Кытайдын Кыргызстандагы элчиси Лю Цзянпин менен жолугушуусу өттү.
Жолугушуунун жүрүшүндө министр элчини жаңы кызматка дайындалышы менен куттуктап, кыргыз-кытай маданий, маалыматтык жана жаштар саясаты боюнча кызматташтыктын дагы да бекемделишине ишенимин билдирди. Ал ошондой эле Кытайдын Кыргызстандагы маданий демилгелерге болгон колдоосун белгилеп, гуманитардык тармактагы активдүү кызматташтыгы үчүн ыраазычылык билдирди.
Өз кезегинде, элчи Лю Цзянпин министрди жаңы кызматка дайындалышы менен куттуктап, эки өлкө ортосундагы кызматташтыкты мындан ары дагы жакшыртууга даярдыгын билдирди. Ал кыргыз тарапты Кытайда өтө турган бир катар ири маданий иш-чараларга катышууга чакырды.
"Тараптар маданий мурасты сактоо, маалыматтык коопсуздукту камсыздоо, жаштар программаларын уюштуруу, чыгармачыл жамааттардын гастролдорун өткөрүү жана башка биргелешкен долбоорлор боюнча кызматташтыкты күчөтүү боюнча өз ара тилектештигин билдиришти",-деп айтылат маалыматта.
