Бишкек, 19.06.26. /Кабар/. Бүгүн Кыргызстан жана Казакстан мусулмандарынын дин башкармалыктарынын ортосунда адал индустриясы жаатындагы өз ара кызматташтыкты өнүктүрүүгө багытталган меморандумга кол коюлду.
Кыргызстан мусулмандарынын дин башкармалыгынан билдиришкендей, меморандумдун алкагында тараптар адал стандарттарын өнүктүрүү, тажрыйба жана маалымат алмашуу, адистердин кесиптик билимин жана квалификациясын жогорулатуу маселелерин макулдашты. Муну менен катар адал сертификаттарын өз ара таануу багыттарында биргелешкен иштерди жүргүзүү пландалууда.
Ошондой эле документте адал продукцияларын өндүрүү, сертификациялоо жана көзөмөлдөө жаатындагы алдыңкы тажрыйбаларды бөлүшүү, эки өлкөнүн тиешелүү адистеринин ортосунда туруктуу кесиптик байланыштарды түзүү жана биргелешкен иш-чараларды уюштуруу маселелерине өзгөчө көңүл бурулган.
