Бишкек, 15.05.26. /Кабар/. Күн мурун тышкы иштер министри Жээнбек Кулубаев жана юстиция министри Аяз Баетов Европа парламентинин делегациясы менен биргелешкен жолугушуу өткөрдү.
Ведомстводон маалымдашкандай, делегацияны Европа парламентинин депутаты, Европа парламентинин Кыргызстан боюнча туруктуу баяндамачысы Начо Санчес Амор жетектеп келди.
Ошондой эле делегациянын курамында Борбор Азия өлкөлөрү менен байланыштар боюнча топтун мүчөсү, депутат Кристиан Вигенин да бар.
Сүйлөшүүнүн жүрүшүндө министрлер Европа биримдиги менен тең укуктуу жана өз ара пайдалуу кызматташууну өнүктүрүү Кыргызстандын тышкы саясатынын артыкчылыктуу багыттарынын бири экенин белгилешти. Ошондой эле соода-экономикалык, инвестициялык жана транспорттук байланыштарды кеңейтүүнүн маанилүүлүгү белгиленди.
Өз кезегинде Начо Санчес Амор кыргыз тараптын кызматташуунун актуалдуу маселелери боюнча ачык диалог жүргүзүүгө даярдыгын оң баалап, европалык тарап Кыргызстандын укуктук тутумуна урматтоо менен мамиле кыларын белгиледи. Ошондой эле ал стратегиялык мааниге ээ минералдар, транспорт, мыйзам үстөмдүгү, билим берүү жана туризм тармактарындагы биргелешкен долбоорлорду ишке ашыруунун маанилүүлүгүн белгиледи.
Жолугушуунун соңунда тараптар Кыргызстан менен Европа парламентинин ортосундагы ар тараптуу кызматташтыкты мындан ары чыңдоо максатында үзгүлтүксүз саясий байланыштарды колдоп турууну макулдашышты.
