Бишкек, 25.11.25. /Кабар/. 17-ноябрдан 20-ноябрга чейин Кыргызстандын Мамлекеттик бажы кызматынын делегациясы бажылык администрациялоодо заманбап санариптик чечимдерди ишке ашырууну изилдөө үчүн Азербайжанга барды.
Ведомстводон маалымдашкандай, иш сапардын жүрүшүндө кыргыз делегациясы Азербайжандын бажы органдарында электрондук бажы декларациялоо системасы, тобокелдиктерди башкаруу системасы, төлөм шлюзу, киберкоопсуздук механизмдери жана келип түшкөн декларацияларды бөлүштүрүү системасы менен таанышты.
Улуттук "Бирдиктүү терезе" системаларынын өз ара аракеттенүүсүнө өзгөчө көңүл бурулду. Эки өлкөнүн "Бирдиктүү терезе" системаларынын өкүлдөрү бажы жагынан жол-жоболоштуруу процессине санариптик куралдарды интеграциялоо боюнча практикалык кадамдарды дагы талкуулашты.
Сапардын жыйынтыгында Кыргызстан менен Азербайжандын бажы кызматтарынын ортосунда маалымат алмашуу үчүн протоколду жана техникалык мүнөздөмөлөрдү даярдоо жана кол коюу боюнча макулдашуу жетишилди. Ошондой эле тараптар эки өлкөнүн "Бирдиктүү терезе" системаларынын ортосундагы сертификаттарды электрондук түрдө алмашууну уюштуруу ниетин ырасташты.
Жумушчу сапардын жыйынтыктары эки тараптуу кызматташтыкты чыңдоодо, санариптик чечимдерди иштеп чыгууда жана бажылык администрациялоонун натыйжалуулугун жогорулатууда маанилүү кадам болот.
