Бишкек, 07.02.26. /Кабар/. Агартуу министри Догдуркүл Кендирбаева Австриянын делегациясы менен видеоконференция форматында сүйлөштү.
Ведомстводон маалымдашкандай, жолугушуунун жүрүшүндө тараптар темир жол тармагындагы кесиптик-техникалык кадрларды даярдоо тутумун талкуулап, практикага багытталган окутуунун жана дуалдык билим берүү тутумунун натыйжалуулугун белгилешти.
Австриялык делегация кадрларды даярдоо боюнча өз өлкөсүнүн тажрыйбасын кеңири тааныштырып, бир катар сунуштарды киргизди. Анын ичинде: машинисттерди европалык стандарттар боюнча даярдоо, коопсуздук маселелери жана тренинг-борборлорду камтыган воркшоптордун программасын түзүү, ошондой эле алдыңкы тажрыйбаны үйрөнүү үчүн таанышуу сапарларын уюштуруу сунушталды.
Министр конкреттүү сунуштар үчүн ыраазычылык билдирип, Кытай — Кыргызстан — Өзбекстан темир жолун куруунун стратегиялык долбоорунун алкагында жаңы адистиктерди ачуу, стандарттарды иштеп чыгуу, практиканы киргизүү жана адистердин жаңы муунун даярдоо милдети турганын баса белгиледи.
Жолугушуунун жыйынтыгында тараптар кадрларды даярдоо боюнча «жол картасын» иштеп чыгуу, тажрыйба алмашуу жана эки тараптуу кызматташтыкты андан ары чыңдоо боюнча макулдашты.
