Бишкек, 30.09.26. /Кабар/. Соода-өнөр жай палатасынын президенти Темир Сариев Валенсияда өткөн Eurochambres бизнес-форумунда европалык ишкерлерге Кыргызстандын соода жана инвестициялык мүмкүнчүлүктөрүн тааныштырды.
Мекемеден билдиришкендей, ал Кыргызстандын тарыхый Улуу Жибек жолундагы орду бүгүнкү соода-экономикалык байланыштарды өнүктүрүүгө шарт түзөрүн белгиледи.
Сариев Кыргызстандын экономикалык өсүшүн, салыктык жеңилдиктерин жана логистикалык мүмкүнчүлүктөрүн айтып, Кытай – Кыргызстан – Өзбекстан темир жолу ишке кирсе, Европага жүк жеткирүү мөөнөтү 12-14 күнгө чейин кыскарышы мүмкүн экенин билдирди.
Ошондой эле Бишкек менен Европанын борборлорунун ортосунда түз авиакаттамдарды ачуу маселеси каралып жатканы айтылды.
Кыргызстандын Соода-өнөр жай палатасы европалык инвесторлорго өнөктөш тандоодон тартып, B2B жолугушууларды уюштурууга жана долбоорлорду ишке ашырууга чейин колдоо көрсөтүүгө даяр экенин билдирди.
