Бишкек, 26.06.26. /Кабар/. Экономика жана коммерция министри Бакыт Сыдыков Евразия өнүктүрүү банкынын бизнес-форумунун алкагында өткөн "Евразия 2030+: инвестициялар, өсүш жана жаңы мүмкүнчүлүктөр" аттуу пленардык жыйында сөз сүйлөдү.
Ведомстводон маалымдашкандай, иш-чара банктын түзүлгөндүгүнүн 20 жылдыгына арналган жана Алматы шаарында өткөн ЕӨБдүн жылдык жыйынынын офлайн форматтагы ишинин уландысы болду.
Бакыт Сыдыков өз сөзүндө Кыргызстан "Евразия 2030+" күн тартибин ишке ашырууга жогорку макроэкономикалык көрсөткүчтөр менен кирип жатканын белгиледи. 2021-2025-жылдары өлкөнүн ИДПсынын орточо жылдык өсүшү 9,2%ды түзсө, 2026-жылдын январь-май айларынын жыйынтыгы боюнча экономика 12,2%га өстү.
Министр Кыргызстандын 2030-жылга чейинки Улуттук өнүгүү программасы жыл сайын кеминде 8% деңгээлде туруктуу экономикалык өсүштү камсыз кылууну карай турганын баса белгиледи.
"Биздин башкы милдетибиз – жетишилген өнүгүү темптерин сактап, 2030-жылга чейин жыл сайын кеминде 8% деңгээлде туруктуу экономикалык өсүштү камсыз кылуу", – деди ал.
Негизги багыттар катары индустриалдаштыруу, Кыргызстанды соода, логистика жана транзит багытындагы регионалдык хаб катары өнүктүрүү, айыл чарбасын жана туризмди тездетип өнүктүрүү, ошондой эле жашыл энергетиканын потенциалын ачуу белгиленди.
Сыдыков коюлган максаттарга жетүү үчүн олуттуу инвестициялык ресурстар жана узак мөөнөттүү каржылоонун натыйжалуу механизмдери талап кылынарын белгиледи. Ушуга байланыштуу Евразия өнүктүрүү банкы сыяктуу эл аралык өнүктүрүү институттарынын түзүмдүк өзгөрүүлөргө жана региондук интеграцияга көмөктөшкөн өнөктөштөр катары ролу жогорулоодо.
Жыйынтыгында министр улуттук өнүгүү программаларын, ЕАЭБдин интеграциялык механизмдерин жана ЕӨБдүн инвестициялык мүмкүнчүлүктөрүн бириктирүү Евразия аймагында 2030-жылга чейин жана узак мөөнөттүү келечекте сапаттуу экономикалык өсүштү камсыз кылууга мүмкүндүк берерине ишеним билдирди.
