Бишкек, 26.06.26. /Кабар/. Кыргызстандын почтасы Евразия өнүктүрүү банкынын (ЕӨБ) 20 жылдыгына арналган атайын почта маркасын жүгүртүүгө чыгарды.
Экономика жана коммерция министрлигинен билдиришкендей, марканын биринчи нускасына салтанаттуу түрдө мөөр басуу аземи ЕӨБдүн жылдык жыйынынын жана Ишкердик форумунун алкагында өттү.
Иш-чарага экономика жана коммерция министри Бакыт Сыдыков, ЕӨБ башкармалыгынын төрагасы Николай Подгузов жана "Кыргыз почтасынын" өкүлдөрү катышты.
Бакыт Сыдыков банкты мааракеси менен куттуктап, Кыргызстан менен кызматташуунун маанилүүлүгүн баса белгиледи. Ал бул өнөктөштүк мындан ары да бекемделерине ишеним билдирди.
Өз кезегинде Николай Подгузов бул марканын чыгарылышы Кыргызстандын ЕӨБгө мүчө болгонунун 15 жылдыгына туш келгенинин символикалык маанисин белгиледи. Ал биргелешкен иштер мындан ары да Кыргызстандын жана бүткүл евразиялык мейкиндиктин туруктуу өнүгүүсүнө өбөлгө түзөрүнө ишенерин айтты.
