Бишкек, 13.03.26. /Кабар/. Кыргызстан Евразия экономикалык биримдигинин алкагында бир катар негизги багыттар, анын ичинде фитосанитардык көзөмөл, азык-түлүк продукциясын ташып келүү жана ташып чыгууну жөнгө салуу, ошондой эле соода тоскоолдуктарын жоюу боюнча ишти жандандырууну көздөп жатат. Бул тууралуу экономика жана коммерция министринин орун басары Чоро Сейитов билдирди.
Анын айтымында, Кыргызстандын рыногуна кирген бардык эле продукциялар белгиленген стандарттарга жооп бербейт. Буга байланыштуу көзөмөлдү күчөтүүгө жана жөнгө салуу механизмдерин өркүндөтүүгө өзгөчө көңүл бурулат.
"Жүргүзүлүп жаткан иштерге карабастан, ЕАЭБдин алкагында дагы деле айрым тоскоолдуктар сакталып калууда. Биз өз ара сооданы өнүктүрүү үчүн аларды жоюуну улантуу ниетиндебиз. Биринчи кезекте тоскоолдуктарды жана бөгөттөрдү квалификациялоо методологиясын кайра карап чыгуу пландалууда. Кыргыз тарап мындай көйгөйлөрдү кароонун деңгээлин жогорулатуу маселесин демилгеледи. Бир катар учурларда талаптар ЕАЭБ сотуна жөнөтүлөт, анткени ар кандай түшүнбөстүктөр жаралат. Биз бул процесстин туруктуу болушун жана чечимдердин тез арада кабыл алынышын каалайбыз", - деп белгиледи ал.
Министрдин орун басарынын айтымында, бул биримдикке кирген өлкөлөрдүн ортосундагы сооданы жана башка чектөөлөрдү азайтат.
Ошондой эле Кыргызстан транспорттук инфраструктураны өнүктүрүү чөйрөсүндөгү ишти улантууну көздөйт. Сөз евразиялык транспорттук коридорлорду өнүктүрүү, транспорт жана логистика тармагындагы интеграциялык инфраструктуралык долбоорлорду ишке ашыруу, ошондой эле документтерди тариздөө жана товарларды жылдыруу менен байланышкан бардык процедураларды санариптештирүү тууралуу болуп жатат.
Интеллектуалдык менчик жаатында иштеп чыгууларды жана товардык белгилерди укуктук коргоо боюнча иштер жүрүп жатат. Энергетика тармагында күйүүчү-энергетикалык комплекстин туруктуу иштешин камсыз кылууга күч жумшалууда.
Мындан тышкары, Чоро Сейитов агроөнөр жай секторун өнүктүрүүнүн жана дары-дармек менен камсыз кылуунун маанилүүлүгүн белгиледи. Ал баса белгилегендей, ЕАЭБ өлкөлөрүндө индикативдик баланстар механизми колдонулат: эгерде бир өлкөдө кайсы бир продукциянын тартыштыгы жаралса, рыноктор биримдиктин башка мамлекеттеринен жеткирүү үчүн тез арада ачылат. Анын айтымында, мындай механизм күйүүчү-майлоочу майга карата ийгиликтүү колдонулуп келет.
Ошондой эле дары-дармек каражаттарын өндүрүүгө болгон талаптарды унификациялоо жана ташылып келген жаныбарлардан алынган продукция белгиленген стандарттарга так жооп бериши үчүн фитосанитардык көзөмөлдү күчөтүү боюнча иштер улантылууда.
