Бишкек, 01.07.26. /Кабар/. Саламаттык сактоо министри Дамир Осмонов БУУнун башкы катчысынын жол кыймылынын коопсуздугу боюнча атайын өкүлү Жан Тодт баштаган делегация менен жолукту.
Ведомстводон маалымдашкандай, жолугушууга Дүйнөлүк саламаттык сактоо уюмунун жана БУУнун Европа экономикалык комиссиясынын өкүлдөрү да катышты.
Министр жол-транспорт кырсыктары өлкөдөгү эң олуттуу медициналык-социалдык маселе бойдон калып жатканын белгиледи. Жыл сайын миңдеген адамдар жабыркап, өзгөчө эки дөңгөлөктүү транспорт айдагандардын арасында жаракат алуунун өсүү тенденциясы байкалууда.
Жан Тодт жолдордогу өлүмдү азайтуу үчүн БУУнун глобалдык демилгелерин, анын ичинде жаңы муундагы жеткиликтүү мотошлемдерди колдонуу, ылдамдыкты чектөө жана мас абалында унаа айдоого каршы өнөктүктөрдү сунуштады.
Ошондой эле үстүбүздөгү жылдын 20-21-июлунда АКШда өтө турган БУУнун Жол кыймылынын коопсуздугу боюнча глобалдык конференциясына даярдык көрүү маселеси каралды. Министр Осмонов аталган иш-чарага катышууга даяр экенин билдирди.
Тараптар жолдордогу өлүмдөрдү жана жаракаттарды азайтуу, ведомстволор аралык кызматташтыкты күчөтүү жана улуттук программаларды өнүктүрүү боюнча биргелешкен иштерди улантууну макулдашышты.
