Бишкек, 23.05.26. /Кабар/. 19-21-май күндөрү Татарстандын алдыңкы энергетикалык ишканаларынын делегациясы Кыргызстанга иш-сапары менен келди. Бул тууралуу Энергетика министрлигинен билдиришти.
Иш сапардын алкагында министр Таалайбек Ибраев жана "Кыргызстан улуттук электр тармактары" ААКтын башкы директору Илгиз Сыдыгалиев конокторду Чүй жана Ысык-Көл облустарындагы маанилүү энергообъекттер менен тааныштырды. Делегация 500 кВ "Кемин" көмөк чордонунда, Бишкек ЭТИнин өндүрүштүк аянтчаларында жана курулуп жаткан "Юнигрин" күн электр станциясында болду.
Сапардын башкы максаты Каракол шаарында чыңалуу алдында иштөөнү үйрөткөн заманбап окуу борборун жана окуу-машыгуу полигонун куруу долбоору менен таанышуу болду. Бул долбоор Таалайбек Ибраевдин демилгеси менен Татарстандын "Сетевая компания" АК ортосундагы келишимдин негизинде ишке ашууда.
Окуу борбору ишке кирсе, Кыргызстан Борбор Азиядагы негизги билим берүүчү борборго айланат. Мында Казакстан, Тажикстан, Түркмөнстан жана Өзбекстандан келген жаш адистер квалификациясын жогорулата алышат. Жергиликтүү кадрлардын кесипкөйлүүлүгү артып, өлкөнүн энергетика тармагы коопсуз жана заманбап деңгээлге көтөрүлөт.
Тараптар инфраструктураны модернизациялоо, автоматташтыруу жана кадрларды биргелешип окутуу маселелерин талкуулашып, бул сапар кыргыз-татар өнөктөштүгүн жаңы баскычка чыгарганын белгилешти.
