Бишкек, 31.03.26 /Кабар/. Бүгүн Пекин шаарында финансы министринин орун басары Нурбек Акжолов Азия инфраструктуралык инвестициялар банкынын вице-президенти Константин Лимитовский менен жолугушту.
Финансы министрлигинен билдиришкендей, жолугушуунун жүрүшүндө тараптар эки тараптуу кызматташуунун учурдагы абалын терең талдап, аны мындан ары бекемдөө жана кеңейтүү боюнча конкреттүү багыттарды аныкташты. Өзгөчө көңүл учурдагы инвестициялык долбоорлордун натыйжалуу жүзөгө ашырылышына жана Кыргызстандын туруктуу социалдык-экономикалык өнүгүүсүн камсыздоого багытталган жаңы демилгелерди иштеп чыгууга бурулду.
Жолугушуунун алкагында тараптар өлкөнүн артыкчылыктуу экономикалык секторлорунда, анын ичинде инфраструктураны модернизациялоо, энергетика жана транспорт тармактарын өнүктүрүүдө АИИБдин катышуусун кеңейтүү мүмкүнчүлүктөрүн кеңири талкуулашты.
Жыйынтыгында тараптар өнөктөштүктү мындан ары тереңдетүүгө жана экономиканын артыкчылыктуу секторлорунда кызматташууну чыңдоого бекем кызыкдар экендиктерин расмий түрдө ырасташты.
