Бишкек, 03.02.26. /Кабар/. Күн мурун "Кыргызалтын" ААКта америкалык Pangea Global, Mooney Group жана TETHYS Gateway Investment, Nasdaq компанияларынын жетекчилери менен сүйлөшүүлөр жүргүзүлдү.
Ишканадан билдиришкендей, жолугушууда тараптар тоо-кен тармагын өнүктүрүүнүн келечегин, заманбап технологияларды киргизүүнү, ошондой эле эл аралык стандарттарга жана Европа биримдигинин талаптарына ылайык ата мекендик өндүрүштү өнүктүрүү, жаңы технологиялар менен лабораториялык изилдөөлөрдү жүргүзүү жана тоо-кен ишмердүүлүгү боюнча адистерди окутуу маселелерин талкуулашты.
Мындан тышкары, туруктуу өнөр жай экосистемасын түзүү жана куруу маселелери каралды.
Жыйынтыгында "Кыргызалтын" ААК менен Pangea Global, Mooney Group жана TETHYS Gateway Investment компанияларынын ортосунда өз ара түшүнүшүү жөнүндө меморандумдарга кол коюлду.
Маалымат үчүн: Пангея (Pangea Global) - Евразияда энергетикалык трансформацияны жана сейрек кездешүүчү элементтерди казып алууну стимулдаштыруу үчүн энергетика тармагын өнүктүрүү жана масштабдуу, келечектүү, геологиялык, гидрологиялык технологиялык жетишкендиктерди киргизүү менен алектенген америкалык компания.
Муни групп (Mooney Group) - тоо-кен, мунайды кайра иштетүү жана кайра иштетүү тармактарында вертикалдуу интеграцияга басым жасоо менен, эң маанилүү минералдар жана стратегиялык металлдар жаатында инвестициялоого жана консалтингге адистешкен компания.
Тэтис Гэйтуэй Инвестмент (TETHYS Gateway Investment) - Түркия жана Борбор Азиядагы эң маанилүү пайдалуу кендер, инфратүзүм жана энергетика тармагындагы долбоорлорго жана "Ортоңку коридордун" логистикасына адистешкен Люксембургдук стратегиялык инвестициялык платформа. Ал жеке капиталга багытталган.
Nasdaq - дүйнө жүзү боюнча капитал рынокторунун инфратүзүмүн, маалыматтарды, технологияларды жана финансылык кызматтарды көрсөтүүчү америкалык фондулук биржа жана технологиялык компания.
