Бишкек, 16.07.26. /Кабар/. Франциянын Авиньон шаарында өтүп жаткан дүйнөдөгү эң ири көз карандысыз театр фестивалдарынын бири – "Avignon Off 2026" иш-чарасынын алкагында Кыргызстандын маданий кечеси ийгиликтүү өттү.
Маданият, маалымат жана жаштар саясаты министрлигинен билдиришкендей, "Борбор Азия күндөрү: Кыргызстан" программасынын алкагында уюштурулган кечеде конокторго ата-мекендик театр өнөрүн чагылдырган видео, улуттук сүрөт көргөзмөсү, улуттук тамак-аштар жана атайын музыкалык программа тартууланды.
"Иш-чарага Франциянын ТИМ өкүлдөрү, Кытайдын Франциядагы консулдугунун өкүлдөрү, Авиньон шаарынын муниципалдык кеңешчиси жана эл аралык театр адистери катышып, кыргыз маданиятына жогорку баа беришти", - деп айтылат маалыматта.
Бул маданий кече фестивалга катышып жаткан мамлекеттик "Учур" жаштар театрынын чыгармачылык программасынын алкагында уюштурулду.
Белгилей кетсек, кыргыз театры аталган фестивалда залкар жазуучу Чыңгыз Айтматовдун чыгармасынын негизинде сахналаштырылган "Бугу Эне" спектаклин көрүүчүлөргө сунуштайт. Спектаклдин премьерасы бүгүн, 16-июлда өтүп, көрсөтүүлөр 25-июлга чейин уланмакчы.
